Božićni običaji naše familije

         Meni je Božić nojlepši svetek. Negdašji običaji su ostali zanavejk zapisani  v naša srca i odnavek se poštuvleju.

        Božićno vreme počne na početku dvanajstoga meseca. Prvo je Sveta Barbara, za jom sveti Nikola pak onda Sveta Lucija. Na Svetu Luciju se seja pšenica.  Odma posle se se lampice v selu vužgeju.  V škouli se deca počneju spominati  kaj budu pod bor dobili. Ide, ide dvanajsti mesec, sam jenput je Božić tu. Na Badnjak odvečer si skupa uz Božićne pesme kinčimo bora. Dok se malo zmroči i zvoni  Zdravo Marija, naš japica doneseju nutri slamu štera nas zmišluvle na maloga Isusa dok je ležao na slamici. Japica nam spopejvleju: “Daj vam Bog kojiće, vojiće, puriće, praščiće, v štali telice, v kocu prasice, kruha i vina, a Božjega mira pak nojvejč!” Mi pak si velimo: “Daj nam Bog.” Si skupa si kre bora pokleknemo, zmolimo molitve, zafolimo Bogu za sve kaj nam je dau kroz leto i spopevlemo  svete pesme. Pomalem kak sneg vuni curi tak se i mi sprovlamo v cirkvu na polnoćku. Polnoćka pak je puna veselja, radosti i Božjega mira, od sega srca se popejvle i moli. Takši Božićni duh se prenese na se ljude i si su odma veseli. Dok se dojde s cirkve lehko se neka pojej  posle posta šteroga se držimo na Badnjak. Na Božićno jutro si skupa idemo v cirkvu i cejli den je obitelj na okupu. Posle Meše je svečani obed. Na stolu je obilje hrone i kolači štere preprovlamo prije Božića.  Posle obeda skoučimo glet pod bor kaj smo dobili. Na Božić se nejde čestitat v selo, nego na Štefaje. Naša mamica su navek rekli da je Božić tak veliki svetek kaj niti nej smeti pometati. Mi se toga sega držimo i čuvlemo store običaje kaj bumo  jih janga dneva mogli prenesti deci.

         Sako leto se isto ponovla, a navek nas veseli. Zato je iščekivanje Božića meni nojlepše vreme. Velim vam, drogi ljudi, čuvlite store običaje kak najvekše blogo jer bu vam to navek  doneslo veliku radost i mir, a zmišluvle nas na naše store koje nosimo v srcu. Srećen vam i blagoslovljen Božić!

                                                                         Marija Paula Radiković, 7.r.

Božić negda

        V mojoj familiji se Božić pred čuda let nej slavio tak raskošno kak ve.

         Pred Božić, prije Badnjaka se cejla hiža pospravljala, jer su ljudi nej meli tak čuda časa kak v denešje vreme. Na Badnjak je navek mamica zamejsila štruce z makom i rehaj i pekla ih v zidani pećnici. Ukrasi za bor su bili rehi i repa zamotani v zlotni paper, črlene jabuke, saloni i lanci od krep papera šteri su se navesili koli bora. Japica je navečer doneseo bora i zapičio ga v repu. Deca su ga z veseljem išla kinčit. Dok je Zdravo Marijo zazvonilo, gazda hiže je doneseo slamu i deo ju pod stol i na joj su se deca igrala. Za večerju su jeli graha, jer je bio post, a posle večerje su išli po seli glet čiji je bor najlepši, jer je običaj bio ka su se fejringe potegle fkraj ka se je bor tijam vum video. Na polnoćku se je išlo peške u grupama, i na meši su se popevale pesme: Radujte se, narodi, Narodi nam se… Posle polnoćke su se jele čurke i hladnetina. Na Božić ga pod borom nej bilo nikši pokloni. Prijepolne se je išlo k meši. Za ručak je bila domaća pečena gouska. Skoro sako leto su v ono vreme meli beli Božić.

            Mislim da je Božić prije nej davao prednosti materijalnim stvarima kak ve i kazao je pravu bit Božića.

                                                                                           Rea Makovec, 7. r.

Međimurski božićni blagdani

         Negda svejta, ali pok nej i tak davno, po meni je se bilo lepše, veseleše. Ve pak smo sij zauzeti z tejm internetom za vrejme svetki. Cejli je svejt modernizejran i natječeju se ko bu dobio vejč lajki na svojoj fotki božićnog drejvca.

        Negda je se bilo lepše i z malo meje pritiska. Negda su ljudi na zornice hodali saki den, i to još od prvog dena Adventa. Na Badnjak su se v jutro rano stajuvali i cejlo dopolne čistili i slagali hronu za svečani obed i za večerju posle polnoćke. A nekaj kaj se delalo prije polnoćke se nebre pozabiti. To je naravno negdašji običaj de je otac donesel slamu i deo ju pod stol simbolilizirajući Isusovo rođeje. Deca su na toj slami sedela, a sij su skupa popejvali božićne pesmice. Za bor pak su im ukrasi bili orehi zamotani v foliju ili bomboni koji su se zvali saloni. A na Božić pak se išlo na tri meše: na polnoćku, de se zapravo dočeka Božić, na zornicu i na jednu tijekom dneva. Nekaj kaj je moja familija delala bilo je to da su sosedaj nesli koloče za Božić. I tak, zabavni, šareni, slatki i vrlo voljeni Božić i Badnjak tak su se negda slavili i organizirali.

         Neje niti ve grdo, ali mislim da bi sij mi i takši Božić bor jempot šteli meti.

                                                                                          Ana Božić, 7. r.